ប្រាជ្ញអើយភ្ញាក់ឡើង
១. សម័យឥឡូវ អ្នកខ្លៅគ្រងប្រាជ្ញ ព្រោះអាងអំណាច ទឹកប្រាក់សុទ្ធត្រូវ
ប្រាជ្ញគោរពច្បាប់ មិនបំពានខ្លៅ ឯរឿងអាស្រូវ ខ្លៅធ្វើទាំងអស់។
២. ខ្លៅប្រព្រឹត្តកាច គ្មានស្ដាយស្រណោះ ខ្លៅគិតអាឡោះ ត្រឹមតែប្រាក់កាស
អំណាចផ្ទាល់ខ្លួន ខ្លៅធ្វើឯងណាស់ ឯប្រាជ្ញវិញខ្វះ តែភាពក្លាហាន។
៣. ប្រាជ្ញសំងំសុខ ស្រុកគេបំពាន ក្លាហានប្រាជ្ញគ្មាន ខ្លៅបំពានខ្លាំង
ប្រាជ្ញអាងចំណេះ ខ្លៅអាងកម្លាំង ប្រាជ្ញមិនតតាំង សុខត្រឹមអាត្មា។
៤. ប្រាជ្ញអើយភ្ញាក់ឡើង ព្រមដោយហានក្លា ជួយស្រង់ខេមរា ឲ្យផុតវឹកវរ
ប្រាជ្ញត្រូវដឹកខ្លៅ ឆ្ពោះទៅរកល្អ ឲ្យស្គាល់ខ្មៅស បាបបុណ្យគុណទោស។
៥. ប្រាជ្ញអើយអាសូរ ដល់ខ្មែរស្រីប្រុស មេត្តាសន្ដោស ដល់ខ្មែរក្រីក្រ
ដោះស្រាយឲ្យឆាប់ ចំណាប់បានល្អ ខ្លៅនឹងលែងត រឿងអាងប្រាក់ទៀត។
៦. បើប្រាជ្ញភ្ញាក់ខ្លួន ខ្មែរបាត់វិវាទ ខ្លៅលែងពាលទៀត ញាតិចូលចិត្តប្រាជ្ញ
ខ្មែរទាំងស្រីប្រុស ត្រូវតែអង់អាច ដេញខ្មាំងកុំខ្លាច ប្រាជ្ញមានតម្លៃ៕
រួមគ្នាជួយស្រាយ
១. អាណិតទន្លេ ពេញដោយផ្ទះទឹក ទាំងល្ងាចយប់ព្រឹក ទឹកពេញដោយផ្ទះ បណ្ដែតរាយប៉ាយ ក្លិនស្អុយឆ្អាបឆ្អេះ រដ្ឋខ្មែរជាន់នេះ ពិបាកចាត់ចែង។
២. អាណិតមច្ឆា ត្រីក្រាញ់អណ្ដែង ក្លិនប្រេងក្លិនផ្សែង ជាតិពុលពេញទឹក ពលរដ្ឋធ្លាប់ប្រើ រាល់ពេលយប់ព្រឹក ពេលនេះទឹកផឹក លែងបានដូចមុន។
៣. អាណិតធម្មជាតិ ជួបរឿងស៊យស៊ុន ប្រែខុសពីមុន ធនចេះតែខ្សត់ រាស្ត្រត្រូវដាច់ស្បៀង ភូមិលែងសប្បាយ ជាតិមកពីឆ្ងាយ ជ្រៀតនៅឥតក្រែង។
៤. អាណិតខ្មែរក្រោយ ជួបទុក្ខមិនលែង ជាតិគេឥតក្រែង មកបំផ្លាញខ្មែរ អុកឡុកគ្រប់ទី មិនថាក្រុងស្រែ ជាតិអើយជាតិខ្មែរ ថ្ងៃណាផុតភ័យ។
៥. អាណិតបឹងបួ រាក់រាល់តែថ្ងៃ គ្មានអ្នកខ្វល់អី បើកឲ្យគេនៅ ផ្ទះបណ្ដែតទឹក នាំរឿងអាស្រូវ សូមគិតមើលទៅ ត្រូវដោះឲ្យឆាប់។
៦. បើមិនដោះទេ ខ្មែរមុខនឹងស្លាប់ ផ្ទះទឹកសម្លាប់ មច្ឆាទាំងអស់ ផ្ទះទឹកបំពុល ទឹកគ្មានស្រណោះ សូមខ្មែរស្រីប្រុស រួមគ្នាជួយស្រាយ៕
